සිහිනය

සෙල්ලමින් සිනහවෙන් කාලය ගෙවූ
පුංචි ළමාවිය අතීතයට මුසුකර දමා
පොත් ප්‍රශ්න පත්තර
උසට උසේ මා වටකර ගොඩනගා ඇති
පවුරක් සේ මා දෙස බලා සිටී
උදයේ පාසලටත් දහවල ටියුෂන්වලටත් යටවී
රාත්‍රියද
චිමිනි ලාම්පු එළියෙන් මැටි බිත්ති හා පොල්අතු
වහලය අතරට සිරවී
කණාමැදිරි රැහැයි හඩ පමණක් ඉතිරි වූ යාමයේ
නිදිවරමින් මෙසේ වෙරදරන්නේ
අධ්‍යාපනයේ එක් කඩයිමක
දොර කවුළු විවර කර ගැනිමටද
නැතහොත්
යළිත් ඒ ගෙවූ ළමාවියේ මිහිරියාව
බොදව යන්නට නොදී
උදාකර ගැන්මටද ?

තනි වූ දැරිය

යුද කදවුරේ තනිවූ මා හට
කාත් කවුරුත් නැත බලන්නට
වෙඩි හඩට මා කොහේ යන්නද
පැල්පතේ මා සිටිමි දුකසේ

මාපියෝ වෙඩි වැදී මිය ගියේ
තනි කරවමිනි මෙලොව මං
කුසට අහරක් නැතිව කිසිදා
දිවි ගෙවමි මා කදුළු බී

අතීතයේ මා අකුරු කලහැටි
මතක නැතුවා නොවේ මා හට
නමුත් දැන් එය සිහිනයකි මට
බිදී ඇත මගේ ළමා ලෝකය

කුරිරු යුද්ධය ඉවර වීලා
සාමය දොර ළගට එනතුරු
බලා ඉන්නෙමි අැඩූ කදුලෙන්
මගේ ලෝකය යළි හැදෙනතුරු

තේරවිලි

තේරවිලි නම් වූ ජන සාහිත්‍ය අංගය අයත් වන්නේ ජන ගී සම්ප්‍රදායටයි.ගැමි ජනතාවගේ උපතේ සිට මරණය දක්වා මුහුණ පාන අත්දැකීම් මේවායේ ඇතුළත් වෙයි.මේ අනූව තේරවිලි ජන ගීයේ උපාංගයක් ලෙසින්ද සැලකිය හැක.තේරුම් ගැනීමට අපහසු ලෙස වචන සගවා ඉදිරිපත් කිරීම ප්‍රහේලිකා හෙවත් කේරවිලි ලෙස හදුන්වයි.තෝරන්නටත්,
විසදන්නටත් ඇති දෙය තේරවිල්ලයි.බාල මහලු,උගත් නූගත්,දුප්පත් පොහොසත් කොයි කවුරුත් එකල තේරවිලිවල ආස්වාදය ලැබුවාද තේරවිලි විනෝදය සදහාම ගෙතුණු දෙයක්ම නොවෙයි.එය පණිවුඩ හුවමාරු කිරීමේ ක්‍රමයක් ලෙසද භාවිතා වුවකි.තේරවිලි,ජන ගීයේ උපාංගයකි,මුඛ පරම්පරාවෙන් පැවත එයි,කතෘත්වයක් නැත,අර්ථය සගවා ඉදිරිපත් කරයි,දස අටමත් විරිතෙන් බොහෝ තේරවිලි පබැදී ඇත,දිගම තේරවිලි පැදියට මාත්රාග 32 ක් ඇත.

තේරවිලි වර්ග

සරල තේරවිලි

කුඩා දරුවන් අතර වඩා ප්‍රසිද්ධ තේරවිලි වර්ගයයි.එයින් බොහොමයක් ඇතුළත් වන්නේ ගද්‍ය තේරවිලි වර්ගයටයි.වචනයක ශබ්දය හෝ කේරුම අනූව එයට සමාන දෙයක් කියා එය කුමක්දැයි විමසීම මෙහිදී සිදුවෙයි.
කැලේට ලිය - අරලිය
පුංචි ගෙදර දර - ගිනි පෙට්ටිය
නාන්නට බැරි විල - කරවිල
ඔක්කොගෙම මල්ලී - කොත්තමල්ලී
අම්මා හඩයි දුව පෙරලෙයි - මිරිස් ගල

තුන් තේරවිලි

ළමා වයස පසු කළ දරුවන් අතරේ ඉතා ප්‍රචලිත තේරවිලි වර්ගයකි.පරම්පරා කිහිපයක් තිස්සේ පැවත ආ තුන් තේරවිලි ගැන අපි කවුරුත් දනිමු.තමන් හා අමනාප වූ යහළුවෙකුට කෙළි කවටකම් කරන්නට ඕනෑ වූ විටද නිර්මාණය කළ තේරවිලි තිබේ.ඇතැම් අවස්ථා වල ගම් හා ප්‍රදේශ නාමද තේරවිල්ලට නගයි.ඇතැම් විට ඉංග්‍රීසි,දෙමළ වැනි භාෂාවන්ද තේරවිල්ලට එකතු වී තිබේ.තුන් තේරවිලි සදහා සෑදුනු කවිද තිබෙන අතර ඒවා සීමිතය.තුන් තේරවිල්ලක් පියවර 3 කින් යුතුය.
“කෝටු ඉලක්කය”නැමැති තුන් තේරවිල්ල විසදන්නේ මෙහෙමයි.
පළමු පියවර - කෝටු නම් දර,ඉලක්කය නම් මාන
දෙවන පියවර - දර මාන
තුන්වන පියවර - මරදාන
ගොම කටුව - පෝර උල - ඌරාපොල
මඩ කකුල - පල් ගාත - ගල්පාත
අයිස් මිටි - ඇස් කොට - කොස් ඇට
මෙහෙකාර හෝටල් - බෝයි අවන් - ආයුබෝවන්

හෝඩුවා තේරවිලි

යම් දෙයක් ගැන කුතුහලයක් ඇති කරවීමට මේ තේරවිලි සමත් වෙයි.අප අත්දකින දෙයක් පිළිබදව චිත්ත රූප මැවෙන සේ වචන කිහිපයකින් දැක්වීම මෙහිදී කෙරෙයි.
ආප්පය
උඩට ගිනිලවා මොළවා තිබෙන්නා
දෙගිනි මැදට යහනකි සරසා දුන්නා
දෙපිට තලා පොල් ලුණුලා පොවන්නා
දෙගිනි මැද යහනෙ දරුවෙක් සැතපෙන්නා

කොස් ගෙඩිය
අත්තක් උඩ බුම්මාගෙන
කටු රෙද්දක් පෙරවාගෙන
නාකි වෙලා කදුළු සලන
ලියක් සිටි තෝරනු මැන

ව්‍යංගාර්ථ තේරවිලි

එක් දෙයක් තවත් දෙයකට ආරෝපණය කර වක්‍රව තේරුම් ඉදිරිපත් කරන තේරවිලි වර්ගයකි.කවියෙන් වර්ණනා කරන දෙය තේරවිල්ලේ හෝඩුවාව බවට පත්වේ.ශබ්දය මූලික කරගෙන ද ව්‍යංගාර්ථ තේරවිලි පවතී.
ප්‍රශ්නය
ටං ටං ගාන්නා තෝරා එවාපං
ටිං ටිං ගාන්නා තෝරා එවාපං
මගවැලි පිසින්නා තෝරා එවාපං
දෙගංබඩ රජා තෝරා එවාපං
පිළිතුර
ටං ටං ගාන්නා ගෝනා නොවේදෝ
ටිං ටිං ගාන්නා ලේනා නොවේදෝ
මගවැලි පිසින්නා කුකුළා නොවේදෝ
දෙගංබඩ රජා කිඹුලා නොවේදෝ

වෙදගැට තේරවිලි

රහස් බෙහෙත් හා සංෙයා්ග ක්‍රම ඇතුළත් තේරවිලියි.මේවා අප්‍රකට වචන යොදා අදහස සගවා ඉදිරිපත් කරයි.
අක්කාගේ බෑයේ සුදු මද රැගෙන
මුත්තා ගෙනා පැන් උණුකර අනාගෙන
පත්තා කද මුවක ගෑවොත් විස බසිනා
මුත්තා පල්ල බෙහෙතකි රටට නොකියනා
හුනු ස්වල්පයක් පොල් පැණියෙන් අනා පත්තෑයා දෂ්ඨ කල ස්ථානයේ ආලේප කිරීම හොද බව මෙයින් කියවේ.

අක්ෂර ප්‍රහේලිකා සහ චිත්‍රය බන්ධන
දහම් ගැට කවි
ගණිත ගැටලු
ව්‍යවහාර ඥාන පරීක්ෂණ
රහස් භාෂා අදහස් හුවමාරු කිරීමේ ක්‍රම
තහංචි කවි

කේන්දරය

කේන්දරය කියලා කියන්නේ කෙනෙකු මෙලොව උපත ලැබූ වෙලාවේදී ග්‍රහයන් පිහිටා තිබෙන ආකාරය අනූව සකස් කරන ලද සටහනකි.උපන් වෙලාව,දිනය හා ස්ථානය අනූව පංචාංග ලිත උපයෝගී කරගෙනයි.කේන්දරය බලා කෙනෙකුගේ වර්තමාන මෙන්ම අනාගත තොරතුරු ගැනත් දැනගන්න පුළුවන්.කේන්දර සටහනක් තිබෙන හැම කෙනෙකුටම ලග්නයක්ද අයිතියි.ලග්නය යොදාගනු ලබන්නේ රාශි චක්‍රය අනූවයි.මුළු අහසම තරු රටා 88 කට බෙදා තිබෙනවා.ඒ අතරින් තරු රටා 12 ක් රාශි චක්‍රයට අයත්ය.ඒ රාශි 12 වනුයේ,
මේෂ - එළුවෙක් නිරූපණය වේ.
වෘෂභ - ගවයෙක් නිරූපණය වේ.
මිථුන - නිවුන් සහෝදරියන් දෙදෙනෙක් නිරූපණය වේ.
කටක - කකුළුවෙක් නිරූපණය වේ.
සිංහ - සිංහයෙක් නිරූපණය වේ.
කන්‍යා - මල් කිනිත්තක් අතින් ගත් කාන්තාවක් නිරූපණය වේ.
තුලා - තරාදියක් නිරූපණය වේ.
වෘශ්චික - ගෝනුස්සෙක් නිරූපණය වේ.
ධනු - අශ්වයෙකු පිට නැගි දුනුවායෙක් නිරූපණය වේ.
මකර - මුහුදු අශ්වයෙක් නිරූපණය වේ.
කුම්භ - කළයක් අතින් ගත් කාන්තා රුවක් නිරූපණය වේ.
මීන - මාළු දෙදෙනෙක් නිරූපණය වේ.

දරුවෙකු උපදින වෙලාව අනූව නැගෙනහිර ක්ෂිතිජයේ උදාවී තිබෙන රාශිය එම දරුවාගේ ලග්නය සේ යොදාගන්නවා.උදාහරණයක් වශයෙන් දරුවෙක් දහවල් 2.00 ට උපත ලැබුවා යැයි සිතමු.එවිට එම වෙලාවේදී නැගෙනහිර ක්ෂිතිජයේ උදාවී තිබෙන රාශිය මේෂ නම් එම දරුවාගේ ලග්නය වන්නේ මේෂයි.කේන්දරය නිර්මාණය කරන්නේ ජෝතිෂ්‍යයට අනූවයි. ජේතිෂ්‍යය කියන්නේ ආකාශ වස්තූන්ගේ චලිතය හා ඒවායේ පිහිටීම පදනම් කරගෙන අනාවැකි පළකරන ශාස්ත්‍රයටයි. ජේත්ෂ්‍යය ආරම්භ වී තිබෙන්නේ ඉන්දියාවෙන් බවයි විශ්වාස කරන්නේ,එය වසර 5000 කටත් වඩා පැරණි ශාස්ත්‍රයකි.

කෙනෙකුගේ ජීවිතයේ සාර්ථකත්වය රැදී තිබෙන්නේ ඔහු හෝ ඇය සතු උත්සාහය,ධෛර්යය,
යහපත් ගති පැවතුම් ආදිය මතයි.එහෙත් කේන්දරයද කෙනෙකුගේ ජීවිතයට වැදගත් වෙනවා.අපි හිතමු යම් කෙනෙකුගේ කේන්දරයට අනූව ඒ තැනැත්තාට අපල කාලයක් උදාවෙලා තිබෙනවා කියලා.අවශ්‍යනම් ඒ තැනැත්තාට බෝධි පූජා පැවැත්වීම,සෙත්කවි කීම ආදී ආගමික වත්පිළිවෙත්වල යෙදී එම අපලයෙන් මිදීමට හැකියාව තිබෙනවා.කේන්දරය අපේ ජීවිතය නමැති ගමනේ ඉදිරියේදී හමුවන මාර්ග බාධක පෙන්වා දෙන මාර්ග උපදේශයෙකු වගෙයි.කේන්දරයට අනූව එම මාර්ග බාධක හදුනාගෙන ඒවා මගහැර ජීවිතය නමැති ගමන සාර්ථක කරගැනීමයි වැදගත් වන්නේ.

අසිරිමත් හිමිදිරිය

රිදී පැහැති වලා රොදින්
උඩට උඩු වියන් බැදන්
සුදු මල් පෙති පලස් සදා
කොයි කවුරුත් බලා හිදිත්

නිල්වන් ගිරි හිස මුදුනින්
රිදී වර්ණ රැස් විහිදා
නැගෙමින් එන හිරු දකිමින්
නෙලුම් මලේ පෙති විහිදේ

පිණි බිදු තණ මත වැටිලා
හිරු රැස් දැක සිනහ සලයි
සේපාලිකා මල් දෙක තුන
ගිලිහී නිල් තණ මත වැටෙයි

දං ඕවිට පදුරු මතින්
දෙමලිත්තෝ රෑන් හඩ තලති
ගංගා ඇළ දොළ අතරේ
දණ්ඩි පැටව් වරල් ගසති

උදළු පොඩිය කර තියාන
ගොවියෝ කුඹුරට ඇදෙත්
සුදු කොක් රැළ මෙන් දරුවෝ
ගුරු ගෙදරට පා නගත්

ආදර මගේ අම්මා

දුර ඈතක ගුවන් ගැබේ
සිනහ සලන සදක් වගේ
අපේ ලොවට මලක් වගේ
ආදර අපේ අම්මා

රෑ වුණාම කවි කියලා
නැලෙව්වාලු අපෙ අම්මා
රන් කිරි අපට පොවලා
අප හැදුවේ අපෙ අම්මා

ලස්සන මල් එකතු කරලා
එකිනෙක ගෙන අමුණලා
ඔබේ ගෙලේ පළදින්නම්
ආදර අපෙ අම්මේ

ගෙදර බුදුන් අම්මා යැයි
බුදු හිමියනුත් කිව්වේ
දෙපා වදිමි දස මාසේ
මතක් කරලා හැම කාලේ

නිමිති

ඉදිරි අනාගතයේදී මෙය ඉතා කෙටි කාලපරිච්චේදයක් හෝ දිගු කාලපරිච්චේදයක්ද විය හැක.සිදුවීමට නියමිත දෙයක් ගැන කල් තබා අනාවැකි පළකිරීමට පාදක කරගන්නා සත්වයෙකු හෝ ශාකයක් හෝ වෙනයම් ලක්ෂණයක් “නිමිත්ත”ලෙස සරලව හැදින්විය හැකිය.එසේම එක් එක් ක්ෂේත්‍රයට අදාළ නිමිතිද ඇත.එනම් කෘෂිකර්මාන්තයට අදාල නිමිති,ධීවර කර්මාන්තයට අදාල නිමිති,නිවාස හා වෙනයම් ඉදිකිරීම් පිළිබදව නිමිති ආදී වශයෙනි.
දිය හෝ කිරි පිරි බදුනක් ගත් අයෙකු පෙර මගට හමුවන්නේ නම් එය යන ගමන ඉතා සුභ ඵල දෙන නිමිත්තක් බවට ප්‍රබල විශ්වාසයක් පවතී.
ගමනක් යන විට ඉදුනු කෙසෙල් කැනක් හෝ කෙසෙල් ඇවරියක් ගත් අයකු හමුවන්නේ නම් එය ගමන සුභ වන බවට නිමිත්තකි.
ගමනක් පිටත් වීමට සූදානම්ව පෙර මගට පා තබත්ම ලේනකු හැඩුවේ නම් එය සුභ නිමිත්තකි.
ගමනක් පිටත්වීමේදී පොල් මලක් අතින් ගත් අයකු ඉදිරියට හමුවූයේ නම් එයද අදාල ගමනට සුභ නිමිත්තකි.
ගමනක් පිටත් වන විටම බල්ලෙකු පාර හරහා යන්නේ නම් එය සුභ නිමිත්තකි.
උදෑසන කිරි ගසක් දක්නට ලැබීමද සුභ නිමිත්තකි.
ගෙවත්තේ ගසක,නිවසේ යට ලීයේ හෝ මීයක් බැන්දොත් එය නිවැසියන්ට සුභ ඵල දනවන බවට නිමිත්තකි.
නිවසට ගේ කුරුල්ලන් පැමිණීම හෝ එම නිවසේ ගේ කුරුල්ලන් කූඩුවක් තනාගැනීම හෝ නිවැසියන්ට එම නිවසට සුභ ඵල ලැබෙන බවට නිමිත්තකි.
පූජනීය ස්ථානයන්හි බඹර බැදීම සුභ නිමිත්තක් සේ අතීතයේ සිට සැලකේ.
ගමනක් යන විට නාගයකු පෙරමගට මුණගැසීම සුභ නිමිත්තක් ලෙස සැලකේ.
ගමනක් පිටත් වන විට හූනෙකු චූක් චූක් ගෑමද,බල්ලෙකු කන්පට ගැසීමද අසුභ නිමිති සේ සැලකේ.
නිවසට වවුලන් පැමිණීමද අසුභ නිමිත්තකි.
උලලේනා කෑ ගැසීම ගමටම අසුභ නිමිත්තක් සේ ගැමියෝ විශ්වාස කරති.
ගමනක් යන විට පෙරමගට ගැරඩියෙකු හමුවීම එම ගමන නිෂ්ප්‍රයෝජන වන බව කියාපාන අසුභ නිමිත්තකි.
නිවස ඉදිරියේ ඇති ගසක අත්තක වසා සිටින කෑරලකු හැඩීම අසුභ නිමිත්තකි.
නිවසක වහලයේ දෙබරයක් හෝ බඹරයක් හෝ බැදීම ඒ නිවැසියන්ට අසුභ ඵල ගෙන දෙන්නකි.
නිවස තුළ වේයන් හුඹස් බැදීම අසුභ නිමිත්තකි.
කබරයෙකු නිවස තුළට පැමිණීම ඉතාම අසුභ නිමිත්තක් වශයෙන් ගැමියෝ සලකති.
පොල්කිච්චෙකු නිවසට ඒම හා අමිහිරි නාදයෙන් කෑ ගැසීම නිවැසියන්ට අසුභ නිමිත්තක් ලෙස සැලකේ.
නිවසක වූ කූඩුවක් අතහැර ගේ කුරුල්ලන් නිවසෙන් ඉවත්ම යෑම අසුභ නිමිත්තකි.
ගසක දිරාගිය අත්තක සිට කපුටකු කෑ ගැසීම අසුභ නිමිත්තකි.
ගමනක් පිටත්ව යන විට බල්ලෙකු පෙරටම පැමිණීම නම් එම ගමන සුභ නොවන සේ සැලකේ.එසේම එසේ හමුවන බල්ලා කළු පාට නම් එය ගමන ඉතා අසුභ බවට නිමිත්තකි.
බල්ලන්ගේ උඩ බිරුම හා තිරිසන් රංචු වශයෙන් කෑ ගැසීමද අසුභ නිමිත්තකි.
සීසෑම ආරම්භ කරගෙන යන විට කිරි ඉබ්බෙක් හමුවුනොත් එය ඉදිරි කන්නය යහපත් වන බවට සුභ නිමිත්තක් වශයෙන් ගොවියෝ සලකති.
සීසෑමට යොදාගන්නා ගවයන් ගොවියාගේ පා ලෙවකෑම ඉදිරි කන්නය සරුවන බවට නිමිත්තකි.
පැසුණ ගොයමේ පිළිල හටගැනීම සුභ නිමිත්තකි.
උදෑසන කිරි එළදෙනක් දැකීම සුභ නිමිත්තකි.
තනි සුදු පාට වසු පැටවෙකු ලැබීම ගව පට්ටියට සුභ නිමිත්තකි.
ගව පට්ටියේ ගවයෙක් කොටියෙකු විසින් ඩැහැගෙන යන ලද්දේ නම් එය ගව පට්ටියට හා නිවැසියන්ට අසුභ කාලයක් එළඹෙන බවට නිමිත්තකි.
හොදින් නිදාගෙන සිටින බල්ලෙකු හදිසියේ අවදි වී 3 වරක් උඩ බිරුවොත් එය වසංගතයක් පැමිණීමේ හෝ මරණයක් සිදුවීමේ නිමිත්තක් වශයෙන් සලකති.
බල්ලා නිවසේ එහේ මෙහේ යමින් දොර ජනෙල් ආදිය පහුරුගාන්නේ නම් එය වැසි කුණාටුවක් ළග එන බවට නිමිත්තකි.

ඔබ විය යුත්තේ...

මහත් වූ කම්කටොළු
මැදින් දිවයින
මේ දිගු ගමනේ
නොවන්නට කදෝ පැණියක්
චණ්ඩ හිරු රැසින් හීන වී යන
උත්සාහ කළ යුතුය නුඹ
ඇරඹෙන හෙට දිනේ...
වෙමු අපි සැවොම
කඨෝර නිම්නයක වුව
අභීතව නැගී සිටින
මකරන්දයෙන් පූර්ණ වූද
සැම සතන්හට
නේක ඵල ගෙන දෙන
වෘක්ෂයෝ
උදාවන හෙට දිනේ...

ගෙවී යන පාසල් කාලය

කර වටා අත දමාගෙන
සොදුරු බස් කියමින්
ලපටි සිනා පොඩි
විසුර විසුර
ගත කළ පාසල්
ළමා විය
සිහිනයක් බදුව
ගෙවෙන්නට
ළංව ඇවිදින්ය
පුංචි ඇස් දෙකෙහි
කදුළු පුරවගෙන
හැර යන්නට
බැහැ මට
මිතුරනි ඔබ
සැමම.....
ගත කළ පාසල් විය
සැමදා ජය ගන්නට
වැර දරමු.....
මුළු හදින්ම.....

නිදහස

රැකදෙන්න දෙස බස ද රැස
නූපන් පරපුරට
ගැටී අසිපත්
වැටී රණ දෙරණ මත
තෙමා සියොළග
රත් රුහිරයෙන්
පෙර පරපුරක්
එක්ව එක් සිත්ව
හදවතින් පණ පෙවූ
නිවහල් දේශයක
උදාන ගීතයයි...

නින්ද

දවසේ විරාමය
තබනට හැම දනෝති...
පිවිසෙයි ඇද ළගට
අඩුකර හිසේ බර...
ලස්සන පුන්සිසි හිනැහෙන
සොදුරු රැය...
ඔබහට භාරකරවිය එහි
ගත කෙරුව...
මේ ගත කෙරුමෙ අවසානය
හිමිදිරිය...

පාට...

අම්මේ පොඩ්ඩක් මෙහෙට
එන්නකෝ ඉක්මනට
පොඩි දෙයක් තියෙනවා
මට ඔබෙන් අහගන්න

අම්මේ අද අපේ ටීචර්
පාට ගැන ඉගැන්නුවා
දෙක තුනක් පාට ගැන
කිව්වේ නැත්තේ මොකද ?

ආච්චිගේ පින් පාට
හරි ආදරේ හිතෙන
මාමාගෙ වස පාට
දකිනකොට බය හිතෙන

ටොමියගේ නපුරු පාට
කට වටේ කළු ගැහුණ
ටීචර් දන්නව නේද මටත්
වැඩියෙන් හොදට

පණ්ඩිතයි කියලා මට
බනින්නට නම් එපා
රවන කොට අම්ම හරි
නපුරු පාටයි තමා

පිළිගැනීම

රුක් දෙවියන් සිපගෙන සිටින
තුෂර බිදු
මුතු ඇට මෙන් දිළිසෙන මේ
මනහර උදෑසනේ,
දසතින් ඇසෙන රතිඤ්ඤා හඩ
සමග මිනිසුන් ප්‍රීති ඝෝෂා නගද්දී
ඉතා මිහිරි ලෙස අප දෙසවන
වැටෙන
විහගුන් ගේ ගී රාවය,
දෙවන සහස්‍රයේ නවවන වසර
වන ඔබ
පිළිගන්නට වයන ගීයක් වැනිය
දෙදහස් නවය අවසානයේ
අප අබිමුවට එන
දෙදහස් දහය
සාදරෙන් අප නිවසට
පිළිගන්නා බව
සුමුදු වළාකුළක
රන්වන් අකුරින්
ලියා තබමි.....

පුතුනි රාහුල

සුදු පිරුවටින් ගත සරසවා
කුලගෙයට සමු දී
මව්පිය අවසරය ගෙන
සවන් පිනවන ඝණ්ඨා නාද
සිත් සනසන සදහම් සුවද
පියනැගුවා සොයමින්
රන්වන් පාටින් බැබළුණ බෝ සමිදු අභියසට
කෙස් වැටිය දන් දී
කහවන් සිවුරක් ගත පොරවාගෙන
බුදු රදුන් වැඩි මග පියමනින්න
සසුනට එක් වුනා තවත් රාහුල පුතෙක්
ඉදින් මතුවටත් නුඹ මට පුතෙක් නොව
මුළු මහත් බෞද්ධයන්ට ම පුංචි හාමුදුරුනමක්
එතෙරව සසර අනෙක් අයත් මුදවන්න දුකින්
ඒ පිනම ඇති බුදු පුතේ
මව් සෙනෙහස බැති බරින් පාරමී පුරා
එතෙර වන්නට බව කතර.....

පොඩි සාදු

කහ සිව්රක පැහැය වගෙයි
දාස්පෙතියා මල් පිපුණු යාය
නිල් තුරුලිය සුළගේ වැනෙයි
පොඩි සාදුට පවන් සලා

ඈත මෑත තණ පිටියේ
දුවලා පනින පොඩි ඈයෝ
එල්ලේ ගහපු ඒ කාලේ
මැවී පෙනෙයි පොඩි සාදුට

අම්මට වැද පොත් මිටිය අරන්
පිම්මේ දුවපු ඒ කාලේ
ඒත් අනේ අම්මා අක්කා
වැදලා එන්න නම් බෑ ආයේ

බුදු සාදුගේ බණ පදයයි
පන්සල් වත්තම පාළුයි
බෝ කොළ සිලියේ වැනෙයි
පොඩි සාදුට කදුළු නැගෙයි

යුද බිමේ සටහනක්

හිරු කුමරා
ශෝකාග්නිය
දසන්තයේ විහිදෙමින්
මුහුදේ ගිලී ගොස්
දැඩි අන්ධකාරය
මුළු ලොවෙහි රජ කරනා
නිමේෂයක.....
වෙඩි හඩට එපා
තිගැස්සෙනු
නංගියේ.....
කෙලි සෙල්ලමින් සිටි
නුඹේ පාසල
බිමට පතිත වී.....
කොහිද නුඹේ
යෙහෙළියන්.....
නාඩන් නංගියේ.....
පතමු අපි එක්ව
නැවත මෙවැනි වූ
කුරිරු යුද්ධයක්
ඇති නොවේවා කියා.....

වන සිරියයි කදුකරයයි

වන සිරියයි - කදුකරයයි
නිල් ජලයයි - දිය ඇල්ලයි
වන සතුන්ගෙ - රජ දහනයි
මේ කවි වනයක සිරියයි

ගලා බසින පිරිසිදු දිය දහරයි
පිපී සුවද දෙන වනමල් පොකුරයි
අහිංසක වූ මුව ගෝනුන් රෑනයි
වනයක අසිරිය මේ ලෙස පවසයි

සුසිනිදු සුළගක් ඇග දැවටෙන්නේ
වන මල් තාලෙට පිපී නටන්නේ
සමනල රෑනක් මල් පැණි බොන්නේ
වනයේ සොදුරු බව මින් කියැවෙන්නේ

සිතුවිලි සයුර

රුවක් දිදුලයි නෙතග අබියස
පැතුම් කුසුමන් දෝත පුරවා
මතක සුවදයි නැවුම් දිවියක
සිහින ඡායා ඈත මැවිලා
අහිමි තිළිණය සමරු සටහන්
හදේ පත්ඉරු අතර රැදිලා
සොවින් සුසුමක් මුවින් ගිලිහෙයි
නොනිමි සිතුවිලි දෝර ගලලා

සොදුරු සිහිනයකි මට

නිල් අහස් තලයද
දේදුන්නේ සතු වර්ණයද
පුෂ්පලත්වන්ගේ මනහර පෙනුමද
මාගේ දෙනෙතින්
දැකුමට වරම් නොමැතිද
මා හට
කදුලින් පිරි මාගේ දෙනෙතට
හසරැල්ලක් කවදා ලැබේවිද
තනිකම පාළුව මකනා
මාගේ හැරමිටියට
සදා ණයගැතියි
මා
මවු කුස පිළිසිද ගත් දා සිට
ජීවිත පුරාවටම
ආලෝකය මට සොදුරු
සිහිනයක් පමණි

බුදු පුතෙක් වෙන්නෙමි මම...

සැම දිනකම හිමිදිරියේ කසා වතත් පොරවාගෙන
පිඩු සිගා වැඩි සාදු දිහා
බලන් හිටියේ මම සතුටින්

ශාන්ත සන්සුන් ගමනින්
දෙනෙත බිමට යොමු කරමින්
වඩිනා පොඩි සාදුට
ආසා සිතුණා මා හට

ඇතුළු වුණොත් පැවිදි බිමට
අම්මා නම් අඩන්නෙපා
පන්සලෙ වැඩ සිටියත් මම
අම්ම බලන්න එනවාමයි

මල්ලිට පලු කඩල දෙන්න
කවුරුත් නැති වුනත් ගෙදර
මහතුන්ට කිව්වම මම
එයා පලු කඩලා දෙයි

පෝය දාට බණ ගෙයි හිද
සැමදෙනාට බණ කියන්න
අමා දියෙන් ලොව නැහැවීමට
බුදු පුතෙක් වෙන්නෙමි මම

ඇතුවත් බැරි නැතුවත් බැරි English

මම ශ්‍රී ලාංකිකයෙක්.මට හිතුනා ශ්‍රී ලංකාවෙ ඉංග්‍රීසි වලට මොකද වෙලා තියෙන්නෙ කියලා පොඩ්ඩක් විපරම් කරලා බලන්න.ශ්‍රී ලංකාවෙ අපි හුගක් වෙලාවට අමාරුවෙ වැටෙන එකම තැන තමයි මෙ ඉංග්‍රීසි ඉතින් ඇයි අපිට මෙහෙම වෙලා තියෙන්නේ.මේක ටිකක් ලොකු ප්‍රශ්නයක්.මට හිතෙන විදියට නම් මේ ප්‍රශ්නෙට මුල කිසිම හරයක් නැති ඉංග්‍රීසි ටියුෂන් පන්ති කලාව.ලංකාවෙ අධ්‍යාපන ක්ෂේත්‍රය ගත්තොත් එක් විශයකට අදාල වැඩිම ගුරුවරු සංඛ්‍යාවක් ඉන්න විශය තමයි ඉංග්‍රීසි.නමුත් අපිට තාමත් බැරිත් ඉංග්‍රීසි.මට මතක විදියට මම 1 වසරේ ඉදන්ම ඉංග්‍රීසි පන්ති ගියා.නමුත් තාමත් ඉංග්‍රීසි බැහැ.මොකද ඒකට හේතුව මට දැන් ඉංග්‍රීසි එපා වෙලා.විද්‍යා පීඨ කියලා ජාතියක් තියෙනවා.ඕවයේ ඉන්න තරමක් ඉන්නේ ඉංග්‍රීසි ගුරුවරු.ඕවයෙන් බිහිවන ඉංග්‍රීසි ගුරුවරු මාස දෙක තුනකට සැරයක් අපේ ඉස්කෝල වලට එනවා.වැඩි හරියක්ම මිස්ලා.මොනවද අරන් එන්නේ.සුදු සාරිය ඇදලා 1 පන්තියේ 2 පන්තියේ ඉංග්‍රීසි වචන ටිකක් ලියපු කාඩ්බෝඩ් කෑලි ටිකකුයි ක්ලේ ගුලි ටිකකුයි.පන්තියට ආපු ගමන් උදේද දවල්ද රෑද කියලා නැහැ good morning කියලා අර ගෙනාපු කාඩ්බෝඩ් ටිකයි ක්ලේ ගුලි ටිකයි අරගෙන සෙල්ලම් කරන්න පටන් ගන්නවා.අනේ ඉතින් අපිත් බලන් ඉන්නවා.period එකකට විනාඩි 45 නේ.ඉතින් ඕක ඉවර වෙච්ච ගමන් good bye කිව්වා ගියා.ආයි ආත්මෙකට දකින්න හම්බවෙන්නේ නැහැ.ඉතින් ඔහොම මාසෙකට සැරයක් අළුත් කට්ටියක් ඇවිල්ලා ඒගොල්ලන්ගේ පුහුණුවීම් කරහම අපිට හුලං තමයි.ඉතිං ඊට පස්සේ අපි මොකද කරන්නේ ?ඉස්කෝලේ ඉංග්‍රීසි උගන්නන්නේ නෑ කියලා ටියුෂන් පන්තියකට යනවා.ගිය ගමන් මොකක්ද Tenses.ගොඩක් වෙලාවට පන්තිය කවදහරි ඉවර වෙනකනුත් Tenses.ඉතින් ඕක හරියන්නේ නැති නිසා අපි තව පන්තියකට යනවා.අනේද කියන්නේ කියලා වැඩක් නැහැ ඒකෙත් එහෙම්මමයි.ඉතින් අපි තාමත් ඉංග්‍රීසිසි class යනවා.අපිට තාමත් පුළුවන් Tenses විතරයි.නමුත් කතා කරන්න ගියොත් වචනයක් කතා කරගන්න බැහැ.
සිංහල අපිට ඉංග්‍රීසිසි අත්‍යාවශයමද ?
ඔව් අනිවාර්යෙන්ම.අපිට කොතන ගියත් ඉංග්‍රීසි ඕන වෙනවා,කඩේකට ගියත්,බැංකුවට ගියත්,රැකියාවකට ගියත්...හැබැයි මෙහෙම දෙයක් තියෙනවා,සමහර කට්ටියක් ඉන්නවා සිංහලකම ගැන බරටම කතා කරන.අපි මොකටද ? සුද්දන්ගේ ඉංග්‍රීසිස වලට ඔළුව නමන්නේ අපි අපේ සිංහලෙන්ම වැඩ කරමුකො‍් කියලා.නමුත් සිංහල කියන්නේ දැන් ලෝකේ වදවීගෙන යන භාෂා වලින් එකක්.ඒ වගේම තමයි ඔය කියන තරම් දෙයක් එක පාරටම කරන්නත් බැහැ.මං හිතන විදියට මේ ආත්මෙකට කරන්නත් බැහැ.
හැබැයි අපිට එක දෙයක් කරන්න පුළුවන්.
මොකක්ද ඒ ?
ඒ තමයි අපේ නිෂ්පාදන නව නිර්මාණ ලෝකෙට අපේ නමින් අපේ දෙයක් විදියට ඉදිරිපත් කිරීම.ඒ තුලින් ලෝකය තුල සිංහලකමට යම් වටිනාකමක් දිය හැකි වෙයි කියන එක තමයි මගේ විශ්වාසය.එහෙම නැතුව අපිට ඉංග්‍රීසි එපා සිංහල විතරයි ඕන කිය කියා සටන් පාඨ කියන එක නෙමෙයි.එහෙම වුනොත් මුකුත් නෙමෙයි වෙන්නේ සිංහලකම වෙනුවෙන් කෑගැහුවා කියලා ඉතිහාසගත වෙන එක විතරයි.
මගේ අදහස
අනාගතය ස්පර්ශ කරන්න ලොවම පිළිගත් ඉංග්‍රීසි භාෂාව අත්‍යාවශයයි.ඒකත් ඉගෙන ගත්ත කියලා අපිට පාඩු නැහැ.එහෙම ඉදගෙන සිංහල අපි අපේකම වෙනුවෙන් අපේ යමක් ලොවට ඉදිරිපත් කිරීමයි වඩාත් උචිත යන්නයි මගේ හැගීම.

මගේ ආදරය…

එක් දිනක් මා නෙත ගැටුණ
ඔබ කවුරුන්ද ?.....
සිනාසෙන ඒ දෙනෙත අයිති
නුඹ කවුරුන්ද ?.....
දැනගතින මා හා නුඹ
කතාකල ඒ මොහොත
පිබිදි නව හැගුම් මැද
ඉගි කලේ නුඹ නේද ?.....
මා හදේ ලැගුම් ගත්
නුඹ මගේ මයි නේද ?.....

අනේ මන්දා…

full අවුල්,Blog එකක් නම් පටන් ගත්තා.ඒ වුනාට අනේ මන්දා…,ඒ ගැන මෙලෝ idea එකක් නැහැ.මොනවා කරන්නද කියලා හිතාගන්න බැහැ. ඒ වුනාට ඉතින් මොනවා හරි කරන්නත් එපැයි නේද ?එහෙනම් අපිත් හෙට ඉදන් බලමුකෝ මොකක්ද මේ story එක කියලා .